14 лютага 2020

11 лютага 2020 года на нарадзе пад старшынствам начальніка аддзялення чыгункі Харашэвіча А. А. разгледжана пытанне аб стане невытворчага траўматызму на аддзяленні чыгункі.

За 12 месяцаў 2019 года ў цэлым па аддзяленні чыгункі зарэгістравана 45 выпадкаў невытворчага траўматызму. Колькасць пацярпелых 45 чалавек, з іх смяротна траўмаваны 28 чалавек. Да ўзроўню 2018 года адзначаецца зніжэнне колькасці выпадкаў і пацярпелых.

У 2019 годзе зафіксавана 4 выпадкі траўміравання непаўналетніх грамадзян, з іх 2 са смяротным зыходам.

Усе выпадкі траўміравання грамадзян адбыліся з прычыны невыканання правілаў знаходжання на чыгуначных шляхах, асабістай неасцярожнасці ў зоне павышанай небяспекі паблізу чыгункі.

Для прадухілення выпадкаў невытворчага траўматызму на аддзяленні чыгункі ў 2019 годзе выкананы комплекс прафілактычных і тэхнічных мерапрыемстваў: праведзены гутаркі і лекцыі, паказаны фільмы ва ўстановах адукацыі і на прадпрыемствах, распаўсюджаны памяткі па бяспецы знаходжання грамадзян на аб'ектах чыгуначнага транспарту.   Арганізавана работа атрадаў добраахвотных дружын з ліку работнікаў аддзялення чыгункі.

Акрамя таго, выкананы шэраг тэхнічных мерапрыемстваў: на прыпыначным пункце Трактарны і станцыі Калодзішчы ўведзены ў эксплуатацыю падземныя пешаходныя пераходы, абсталявана агароджа на прыпыначным пункце Трактарны і станцыі Мінск-Сартавальны, выкананы капітальны рамонт пасажырскіх пасадачных платформаў на станцыях Мінск-Пасажырскі, Смаргонь, Уша, Прыяміна, Калодзішчы, прыпыначных пунктах Трактарны, Зялёнае, Бярэзінскае.

У 2020 годзе работа па прафілактыцы невытворчага траўматызму на аддзяленні чыгункі працягнецца.