02 ліпеня 2020

На Мінскім аддзяленні чыгункі надаецца вялікая ўвага прафілактыцы невытворчага траўматызму на аб'ектах чыгуначнага транспарту. Рэгулярна арганізуюцца прафілактычныя акцыі, падчас якіх праводзяцца рэйды, тэматычныя гутаркі ва ўстановах адукацыі і на прадпрыемствах, распаўсюджваюцца анімацыйныя ролікі і відэафільмы, улёткі, плакаты і памяткі.

У мэтах прафілактыкі і папярэджання выпадкаў невытворчага траўматызму, павышэння культуры паводзін грамадзян на аб'ектах чыгуначнага транспарту ў горадзе Мінску ўстаноўлены пяць тэматычных інфармацыйных плакатаў на білбордах. Яны размешчаны ў месцах масавага збору людзей і паблізу чыгуначнага вакзала: на скрыжаванні вуліц Ульянаўская-Энгельса, Валадзько-Аэрадромная, Куйбышава-В. Харужай, а таксама на вуліцах Маскоўскай (з'езд на вул. Суражскую) і Бабруйскай.

Нягледзячы на меры, якія прымаюцца, выпадкі невытворчага траўматызму на аб'ектах чыгуначнага транспарту аддзялення чыгункі з невялікім зніжэннем, але па ранейшаму адбываюцца (19 выпадкаў у 2020 годзе супраць 22 у 2019 годзе).

Асноўнай прычынай няшчасных выпадкаў з'яўляецца ігнараванне грамадзянамі элементарных мер бяспекі. У прыватнасці, знаходжанне ў зоне павышанай небяспекі ў стане алкагольнага ап'янення, размовы па мабільным тэлефоне і праслухоўванне музыкі ў навушніках падчас перасячэння чыгуначных пуцей, парушэнне вадзіцелямі правілаў дарожнага руху пры перасячэнні чыгуначных пераездаў і г. д.

Чыгунка – гэта крыніца павышанай небяспекі. Няма нічога важней чалавечага жыцця, а дзіцячыя жыцці - гэта самае каштоўнае.

БЕРАЖЫЦЕ СЯБЕ І СВАІХ БЛІЗКІХ!