02 снежня 2021

21 лістапада ў Доме культуры чыгуначнікаў г.Орша адбылася прэм'ера музычна-тэатралізаванага прадстаўлення «Муха-Цакатуха - мары здзяйсняюцца». Усё пачынаецца з мары, так лічаць юныя артысты Тэатра танца, удзельнікі студыі эстраднай песні «Онікс» і іх мастацкія кіраўнікі Ірына Сенчыла і Алена Пшавальская, якія выступілі аўтарамі і рэжысёрамі новага творчага праекта.

У гэты дзень сваім стараннем і творчасцю юныя таленты даказалі са сцэны, што мара можа стаць рэальнасцю, калі ў цябе ёсць талент і мэтанакіраванасць. «Муха, муха, цакатуха, пазалочанае чэрава…» – кожны з нас памятае гэтыя радкі з любімага дзіцячага твора Чукоўскага. Кахаюць гэтую казку і юныя артысты, якія вырашылі паказаць гледачам яе новае бачанне. «Муха па полі пайшла, муха грошыкі знайшла» і вядома ж усім стала цікава куды і на што выдаткуе грошыкі Муха-Цакатуха. А галоўнай гераіні не патрэбны грошыкі, у яе мара навучыцца спяваць, каб ёю захапляліся ўсе! Так яно і адбылося. Гледачы былі ў захапленні ад відовішчнасці праграмы, яркіх касцюмаў, цікавай харэаграфіі і прыгожага вакалу. Яны па заслугах ацанілі выступленне творчых калектываў, адорваючы артыстаў гучнымі апладысментамі і захопленымі крыкамі «брава». Усе галоўныя ролі музычна-тэатралізаванага прадстаўлення выканалі ўдзельнікі Тэатра танца і студыі эстраднай песні «Онікс». Мерапрыемства такога фармату ў Доме культуры чыгуначнікаў прайшло ўпершыню. Чарговы раз усе пераканаліся, што ў творчасці няма межаў, што сама па сабе мара не ўвасобіцца, толькі праца дапаможа ажыццявіць яе, а яшчэ падтрымка сяброў і бацькоў, якія ва ўсім дапамагаюць юным артыстам і прымаюць непасрэдны ўдзел у падрыхтоўцы іх выступаў.

Наперадзе вялікія творчыя планы і новыя мары, якія абавязкова здзейсняцца!