16 снежня 2021

На Прывакзальным пляцы яркімі агнямі засвяцілася галоўная чыгуначная ёлка. Без сумневу яна дадасць святочнага настрою і гарманічна дапоўніць гарадскі інтэр'ер.
Колеры - карпаратыўныя і самыя святочныя - сіні і срэбны. Буйныя шары ўпрыгожаны бліскучымі бантамі ў яркай каляровай гаме. Дапаўняюць асноўны строй сотні сняжынак, званочкаў, светлавых фігур анёлаў.
А ў фае 3-га паверха гасцей па традыцыі сустракае "разыначка" навагодняга дэкору - шматлакацыйная фотазона. Тэматыка фотазоны - калядная, сямейная.
Гэта калядны дом, які напаўняе сэрца радасцю і цяплом, у якім пануе атмасфера свята Новага года і Калядаў. Чакаеш і верыш у чараўніцтва. У гэтае свята кожны забывае пра сябе і знаходзіць час для іншых. Яно адкідае бессэнсоўныя і падкрэслівае сапраўдныя каштоўнасці.
Фотазона шматлакацыйная - тут выгода і камфорт упярэмежку з дзіцячымі свавольствамі і цацкамі. Разам з турыстычным цэнтрам "Дортур" і казачнымі чалавечкамі адна з лакацый фотазоны прапануе пракаціцца на цягніку да Белавежскай пушчы ў "Маёнтак беларускага Дзеда Мароза". У іншай лакацыі можна будзе сфатаграфавацца ва ўтульным мяккім крэсле ці ў каміна-партала, праз які ўначы прыходзіць Дзед Мароз.
Няхай у кожнага гэтая зіма будзе казачна цудоўная, няхай яна будзе пахнуць шакаладам, гучаць скрыпкай, саграваць цёплым пледам, кубкам гарбаты, добрымі фільмамі, кнігамі, прыемнымі сустрэчамі.
І галоўнае варта памятаць: калі кожны дзень будзем дзяліцца хаця б маленькай часціцай цяпла з тымі, каго сустракаем на сваім шляху, зіма стане нашмат цяплей. Для ўсіх.