04 студзеня 2022

Новы год - гэта час чараўніцтва, добрай казкі і чаканні цуду, адно з самых любімых, доўгачаканых, радасных і душэўных свят для дзяцей і дарослых. Па традыцыі ў канцы снежня і пачатку студзеня ўсюды пануе сапраўдны казачны настрой.

Яскравым прыкладам таму стаў тэатралізаваны паказ «Навагодні бум або Ух ты, пінгвін!», які прайшоў у святочныя дні ў Доме культуры чыгуначнікаў у горадзе Орша. Захапляльны сюжэт дапамог апынуцца гледачам у казачным лесе, дзе Макрота і Сырасць разам з Бабай Ягой спрабавалі выкрасці Снягурачку і тым самым сапсаваць Новы год. Як вядома ва ўсіх казках перамагае дабро, так адбылося і на гэты раз. На дапамогу Снягурцы паспяшаліся Заяц і Пінгвін з Антарктыды, які апынуўся ўпершыню ў чароўным лесе, пінгвін Піня набывае шмат новых сяброў, сутыкаючыся з навагоднімі прыгодамі.

Увага дзяцей і дарослых ні на хвіліну не адрывалася ад сюжэту. Яны з задавальненнем падпявалі акцёрам і прытанцоўвалі на месцах у такт палымяным знаёмым рытмам. Лёгка было ўявіць замест удзельнікаў Узорнага ансамбля танца «Ві-за-ві» белых пухнатых сняжынак, якія кружыліся ў танцы разам са Снягуркай. Харэаграфічны калектыў "Тэатр Танца" настолькі праўдападобна на сцэне разыграў футбольны матч паміж мядзведзямі і зайцамі, што гледачам захацелася даведацца канчатковы лік матчу.

Узорны цыркавы калектыў "Феерыя" складанымі трукамі, пластычнымі рухамі і паветранымі эквілібрамі стварыў "снежную буру эмоцый і захаплення", паказаўшы прыгажосць зімовага лесу і навагодняга свята. Асаблівую цікавасць выклікалі ў гледачоў відэазванкі да Бабы Ягі, Дзеда Мароза і Пінгвіна. Фінал атрымаўся казачна справядлівым: Дзед Мароз вызваліў Снягурачку, прымусіў адмоўных герояў прызнацца ў сваёй хітрасці і папрасіць прабачэння.

Галоўныя ролі выканалі работнікі Дома культуры і ўдзельнікі народнага тэатра. Апафеозам усяго прадстаўлення стала з'яўленне ёлкі на сцэне і выхад сіняга тыгра - сімвала новага года. Дзіцячаму захапленню не было мяжы. Нават дарослыя паверылі ў казку. Гледачы доўга не адпускалі артыстаў, дорачы буру авацый і апладысментаў.

Ужо пасля прадстаўлення ў калідорах Дома культуры ішло гарачае абмеркаванне ўбачанага. Дзеці разважалі, высоўвалі свае гіпотэзы з нагоды таго, як адбывалася чараўніцтва. А для арганізатараў свята лепшы падарунак да Новага года - шчаслівыя вочы дзяцей.