10 лютага 2022

Лаўрэатамі самай прэстыжнай прэміі на Беларускай чыгунцы па выніках працы за 2021 год сталі калектыў УП «Мінскае аддзяленне Беларускай чыгункі» і калектыў станцыі Орша.

Дарожнай прэміі таксама ўдастоены калектыў аддзела па вядзенні тэхнічнай дакументацыі і пашпартызацыі прылад СЦБ, сувязі, дыягностыкі рухомага саставу, па наладцы і мадэрнізацыі прылад СЦБ і сувязі Мінскай дыстанцыі сігналізацыі і сувязі.

Сярод лепшых работнікаў, якія праявілі ініцыятыву і дабіліся высокіх вынікаў у забеспячэнні бяспекі руху цягнікоў, манеўровай работы і тэхнікі бяспекі, уладальнікам прэміі стаў начальнік станцыі Пухавічы Аляксандр Засіменка.

Прэмія імя машыніста В.А. Яцкевіча - адна з найбольш прэстыжных на Беларускай чыгунцы. Штогод яна прысуджаецца чыгуначнікам па выніках работы за папярэдні год з мэтай паляпшэння работы па забеспячэнні бяспекі руху і тэхнікі бяспекі, развіццю грамадскага кантролю, выхаванню чыгуначнікаў на лепшых прыкладах выканання службовага абавязку.

Машыніст цеплавоза лакаматыўнага дэпо Мінск Уладзімір Аляксандравіч Яцкевіч загінуў у студзені 1967 года, ратуючы жыцці пасажыраў цягніка № 187 Мінск - Талін. Выявіўшы высокае пачуццё абавязку, застаючыся да канца на сваім працоўным месцы, ён прыняў усе магчымыя меры для прадухілення сутыкнення пасажырскага цягніка з групай вагонаў, якія адчапіліся ад грузавога цягніка, на перагоне Пруды - Залессе.

Указам Прэзідыума Вярхоўнай Рады СССР за мужнасць і самаадданасць пры выкананні службовых абавязкаў Уладзімір Аляксандравіч Яцкевіч пасмяротна ўзнагароджаны ордэнам Працоўнага Чырвонага Сцяга. Яго імя носіць пасажырскі цеплавоз ТЭП70БС.